إيه يعنى معنى الغرام
إحساس مهوش مفهوم
كلام وحيره وهيام
وتعب وقلة نوم
بيقولوا لازم يصيبك
مكتوب ولو مكتوم
حتى لو صادفه حيره
ومزله لو بالكوم
تكفى نظرة حبيبك
تنسى كل الهموم
سهم ف قلبك يصيبك
يسرى كما الحلزون
قلبك يقعد يدقدق
بلحن زى الهون
تقعد تبعت رسايل
بالليل على التليفون
طبعا غير الهديا
دباديب بألفين لون
غير دبلة الخطوبه
والعفش والتليفزيون
والدش والإيركوندشن
وبوتوجاز بأربع عيون
تصبح تلاقى نفسك
مديون أو مسجون
والخيبه لو كان حبيبك
لا يعرف من تكون
ساعتها تقلع هدومك
وعقلك يصيبه جنون
وتركب قطر بنها
تنزل على الفيوم
تسكر وتشرب بيره
وجايز كمان افيون
تمشى مسطول متطوح
وتنجر عل الكراكون
وساعتها تاكل طريحه
تورم كما البلون
وتصرخ تقول يا ليلى
ردى أنا المجنون
والقلب يملاه كآبه
والدمع يملى الجفون
وآدى حال كل عاشق
كان بالهوى مفتون
وأخيرا أحمد ربى
عشان عقلى موزون
والحب ناسى طريقى
من مولدى لليوم
...كريم كستن...
ليست هناك تعليقات:
إرسال تعليق