الجمعة، 31 أغسطس 2012
الأحد، 29 أبريل 2012
عمل الخير
قالولى اعمل خير تدخل الجنه
وبالنعيم والهنا تنعم وتتهنى
وأنا ابن آدم ما يملى عينى غير التراب
ما آدم عشان تفاحه خرج من الجنه
..... كريم كستن .....
الجمعة، 13 أبريل 2012
بتفكرنى
بتفكرنى بأول مره فيها حكينا
وبتسألنى
وهى بتنطق أجمل شعر
فاكر أول مره كلام
فاكر الوقت
طب والألش
فاكر طيب لما غمزت
لما عملت انك حبيت
فاكر طيب لما شاكستك
لما داعبتك
لما حاورتك
طيب فاكر لما شكيت
طبعا فاكر أجمل وقت
فيه أنا عيشت
وفيه حسيت
انك اجمل شيء فى الدنيا
حصللى بجد
. . . كريم كستن . . .
الخميس، 12 أبريل 2012
أول مره كلام
بعد الفجر قعدت شويه
عل الفيس بوك
كنت مأريف
قولت ألوك
مين كان قاعد زهقان زيي
واحده جميله
كل يومين تعمل نيولوك
على بروفيلها
قولت أغازلها ونلوك لوك
بره همومنا شويه نعيش
واهو بنهيس لأجل نفك
كلمه ف كلمه لاقتنى أنا بشكى
وهى بتشكى لنفس الحال
نرسم ضحكه وجوه قلوبنا
حزن يكفى ميت موال
صبر جبال
حتى الحلم اللى حكيتهولى
نفس الحلم
نفس القصه
و نفس الفيلم
نفس الحال
حال انسان
شايف الدنيا بعين فنان
وبعد ما كنا بنكتب ألش
كلام تهييس
فى قلوب بعض بدأنا نخش
بدأنا نعيش
وبعد شويه
بعد ما كان الحزن مالينا
فتح القلب لنوره أبواب
قبل ما حتى نشوف بعضينا
فجأه بقينا لبعض أصحاب
وأجمل شيئ فى الحاله آخرها
بعد ما كنت بقول هاغازلها
لقيتها دعيتلى
وأنا من قلبى . . روحت داعيلها
. . . كريم كستن . . .
أهل الدار
يا أهل مصر يا صحاب الدار
ياللى فى قلب اليل
صحيتو لينا نهار
محلى رجوعكم تانى للميادين
محلى رجوع الثوره للثوار
محلى الميدان بدون أحزاب
بدون سياسات
محلى الشهيد اللى ضحى
و ناضل
واللى مات فى سكات
محلاكى يا صبيه
يا جنيه
يا ألف نهار
الاسم مصر وانتى
زينة الأمصار
... كريم كستن ...
حالة ملل
منين هنجيب الكفن
والصبح لسه عليه ساعات
الصبر مات
وأنا وسط ليل
موبوء بداء اسمه السكات
.... كريم كستن ....
فاكر حبيبى
فاكر حبيبى حكاية زمان
فاكر حبيبى الشوق والحنان
فاكر حبيبى لمسة ادينا انت وأنا
فاكر أمالنا المتزوقه بورد وهنا
كان الكلام ده من كام سنه
كان من زماااااااااااااااااان
...كريم كستن.....
مين انا
كومبارس فيكى يا دنيا انا ولا البطل
سؤال بسيط مهوش طمع ولا بطر
بالرغم من فكرى الحويط لكن عبيط
دايما مصدق فيكى لعبة القدر
. . . كريم كستن . . .
الاشتراك في:
الرسائل (Atom)