بعد الفجر قعدت شويه
عل الفيس بوك
كنت مأريف
قولت ألوك
مين كان قاعد زهقان زيي
واحده جميله
كل يومين تعمل نيولوك
على بروفيلها
قولت أغازلها ونلوك لوك
بره همومنا شويه نعيش
واهو بنهيس لأجل نفك
كلمه ف كلمه لاقتنى أنا بشكى
وهى بتشكى لنفس الحال
نرسم ضحكه وجوه قلوبنا
حزن يكفى ميت موال
صبر جبال
حتى الحلم اللى حكيتهولى
نفس الحلم
نفس القصه
و نفس الفيلم
نفس الحال
حال انسان
شايف الدنيا بعين فنان
وبعد ما كنا بنكتب ألش
كلام تهييس
فى قلوب بعض بدأنا نخش
بدأنا نعيش
وبعد شويه
بعد ما كان الحزن مالينا
فتح القلب لنوره أبواب
قبل ما حتى نشوف بعضينا
فجأه بقينا لبعض أصحاب
وأجمل شيئ فى الحاله آخرها
بعد ما كنت بقول هاغازلها
لقيتها دعيتلى
وأنا من قلبى . . روحت داعيلها
. . . كريم كستن . . .
ليست هناك تعليقات:
إرسال تعليق